Comunidá / FAQ
Entrugues frecuentes
Resolvemos les duldes más habituales sobre la llingua asturiana y sobre'l portal, en claro y ensin rodeos.
¿Qué ye l'asturianu?
L'asturianu ye la llingua propia d'Asturies, con sieglos d'historia, lliteratura y una normativa curiada pola Academia de la Llingua Asturiana. Ye una llingua viva que güei falen y deprenden miles de persones.
¿Ye de baldre usar asturianu.org?
Sí, dafechu. Tol conteníu —cursos, gramática, exercicios y simulacros— ye de baldre y abiertu. Financiámonos namás con donaciones voluntaries y merchandising, nunca con muros de pagu.
¿Puedo certificame con asturianu.org?
Non direutamente: nós preparámoste. La certificación oficial de l'asturianu dala la Conseyería d'Educación del Principáu d'Asturies per una prueba oficial. Consulta les convocatories en Educastur (abre nuna llingüeta nueva).
¿Necesito crear una cuenta pa deprender?
Sí. Crees una cuenta col to nome y el to corréu —namás eso—, y esos datos asóciense al to progresu pa que puedas siguir col deprendizaxe onde lu dexasti.
¿Cómo protexéis la mio privacidá?
Por diseñu. Nun usamos Google Analytics, nin Meta Pixel, nin rastrexadores de terceros, y nun emplegamos cookies —nin propies nin de terceros—. Nun facemos fingerprinting nin perfiles de comportamientu: namás revisamos la información pedagóxica del campus pa ameyorar la ferramienta. Puedes consultar los datos guardaos de la to cuenta cuando quieras, descargar esi informe y pidir que los borremos. Los tos datos son tuyos: tu decides qué facer con ellos.
¿Funciona bien nel móvil?
Sí. Diseñamos el portal primero pal móvil: les lleiciones, los exercicios y los simulacros son dafechu funcionales dende cualquier teléfonu.
¿El conteníu sigue la normativa oficial?
Sí. Tol material pedagóxicu sigue la normativa de l'Academia de la Llingua Asturiana (ALLA), tanto na ortografía como na terminoloxía gramatical. Amás, tamos en contautu direutu cola ALLA pa ameyorar el conteníu y garantizar l'usu correutu de la llingua.
¿Cómo puedo collaborar?
De munches maneres: proponiendo correiciones, compartiendo'l proyeutu, convidándonos a un café o aportando conteníu. Somos una comunidá abierta.
¿Qué nota necesito p'aprobar el certificáu oficial d'asturianu?
Falamos del certificáu que da la Conseyería d'Educación del Principáu d'Asturies (Decretu 47/2019), xestionáu al traviés d'Educastur y al que s'accede per mediu de pruebes llibres: nun fai falta haber cursáu nada enantes, puedes prepararte pela to cuenta y presentate direutamente al exame. P'aprobar, tienes que cumplir dos condiciones al empar: sacar polo menos un 50% en cada una de les cinco pruebes individuales (comprensión oral, comprensión escrita, producción oral, producción escrita y mediación) y un 60% de media global ente les cinco. Nun abonda con una bona media si falles claramente nuna destreza. Cuntámoslo con más detalle —y en qué se diferencia d'otres víes como la ALLA o la EOI— na nuesa guía del certificáu oficial.
¿Val el certificáu d'asturianu pa oposiciones docentes?
En parte, y con matices. El C1 de la Conseyería d'Educación sí puntúa nel baremu de méritos de les oposiciones docentes d'Asturies: 0,5 puntos, lo mesmo que'l B2, C1 o C2 d'otres llingües. Pero'l sindicatu SUATEA denuncia que esos mesmos certificaos —B2 y C1— nun se reconocen entá nel rexistru de formación permanente del profesoráu, lo que dexa fuera efeutos como'l complementu salarial o'l so cómputu en concursos de treslaos. Esplicámoslo con tol contestu na nuesa guía del certificáu oficial.